Liverpool hefur áhuga á bæði Luis Suarez og Ashley Young

Liverpool hefur staðfest áhuga sinn á leikmönnunum Luis Suarez og Ashley Young en Damien Comolli, yfirmaður knattspyrnumála, segir þó að það sé langt í það að félagið geti gengið frá samningum um kaup á leikmönnunum tveimur.

„Við erum aðallega að leita að sóknarmanni með hraða því það vantar hraða í liðið. Hvað varðar Suarez þá erum við ekkert byrjaðir að tala við Ajax," sagði Damien Comolli og bætti við:

„Hann er einn af þessum leikmönnum sem við höfum áhuga á. Það er síðan önnur saga hvort hann standi okkur til boða í janúar," sagði Comolli.

Ashley Young hjá Aston Villa hefur einnig verið orðaður við Manchester United og Tottenham en Liverpool ætlar ekki að láta sitt eftir liggja ef Villa er tilbúinn að láta hann

„Við höfum áhuga á honum ef hann er á markaðnum en ég býst þó ekki við því að sú verði raunin," segir Comolli.

Liverpool hefur dregist niður í fallbaráttuna og nýi stjórinn Kenny Daglish er aðeins búinn að ná í eitt jafntefli í fyrstu þremur leikjunum.

„Það er ekkert krísuástand í félaginu. Ég sé hlutina innan frá og hef enga slíka tilfinningu. Þetta snýst bara um sjálfstraust," sagði Comolli.

„[Fernando] Torres og [Steven] Gerrard eru í sama líkamlega forminu og þeir voru þegar liðið náði öðru sætinu tímabilið 2008-2009," sagði Comolli.