Torres: Ég skulda stuðningsmönnum Chelsea

Fernando Torres hjá Chelsea verður í sviðsljósinu á sunnudaginn þegar Chelsea tekur á móti hans gömlu félögum í Liverpool á Stamford Bridge. Torres hefur aðeins náð að skora 5 mörk í 30 fyrstu leikjum sínum með Chelsea og hann þurfti eins frægt er að bíða í 903 mínútur eftir fyrsta marki sínu fyrir Lundúnafélagið.

„Ég þarf bara að halda áfram að leggja mig fram. Ef þú gerir það en hlutirnir ganga ekki upp þá hefur þú ekkert til að skammast þín fyrir," sagði Fernando Torres við Daily Mirror.

Chelsea keypti hann á 50 milljónir punda frá Liverpool í janúar en það hefur lítið gengið hjá spænska landsliðsmanninum sem er ekki lengur fastamaður í byrjunarliði spænska landsliðsins. Torres hefur samt ekki gefið upp vonina um að finna skotskóna á ný.

„Ég skulda stuðningsmönnum Chelsea því þeir hafa alltaf stutt vel við bakið á mér," sagði Fernando Torres. „Ég lofa þeim því að ég mun aldrei og hef aldrei gefist upp," sagði Torres sem skoraði 65 mörk í 102 deildarleikjum með Liverpool.

„Þegar þú kemur á nýjan stað þá má alltaf búist við erfiðleikum. Það er samt þannig að alltaf þegar ég hef átt erfitt uppdráttar þá horfi ég á sjálfan mig í spegli og segi: „Já, ég get aftur komist í mitt besta form," sagði Torres.