Merk víkingagröf fannst í skosku hálöndunum

Breskir fornleifafræðingar hafa fundið fyrstu víkingaskipsgröfina í Bretlandi sem ekki hefur verið hróflað við. Gröfin fannst í skosku Hálöndunum og er talin vera um 1.000 ára gömul.

Gröfin er ríkulega búin og því talið að þar liggi höfðingi frá víkingatímabilinu. Í frétt um málið á BBC segir að þarna sé um mikilvægasta fornleifafund frá tímum víkinganna í Bretlandi að ræða þar sem gröfin er ósnert.

Fornleifafræðingurinn Hannah Cobb sem unnið hefur við rannsóknir á þessu svæði undanfarin sex ár segir að um mjög spennandi fund sé að ræða.

Meðal þess sem fannst í gröfinni voru vopn á borð við sverð, exi og spjót og nokkuð af karlmannsskarti.