Eiginkona Frakklandsforseta ól stúlku

Carla Bruni, eiginkona Nicolas Sarkozy Frakklandsforseta, ól stúlkubarn klukkan sex í dag að íslenskum tíma. Frönsk blöð segja að margmenni hafi safnast saman fyrir utan La Muette fæðingardeildina áður en hún fæddi.

Samkvæmt frásögn BBC var Sarkozy hjá eiginkonu sinni fyrr í dag en fór svo til Frankfurt til viðræðna um skuldavandann í Evrópu. Carla Bruni á einn son frá fyrra hjónabandi. Sarkozy á þrjá syni frá fyrri hjónaböndum. Forsetahöllin í Frakklandi hefur ekki staðfest fæðinguna ennþá.

Carla Bruni hefur látið lítið fyrir sér fara. Hún hefur fullyrt að myndir af barninu hennar muni ekki verða birtar í fjölmiðlum. Börn hennar eigi að fá að ákveða þegar þau verði fullorðin hvort þau vilji verða opinberar persónur.