City í baráttuna um undrabarnið Lukaku

Manchester City hefur blandað sér í baráttuna um belgíska leikmann Romelu Lukaku. Þessi 17 ára leikmaður er gríðarlegt efni og hefur verið byrjunarliðsmaður Anderlect frá því á síðustu leiktíð.

Lukaku hefur verið frábær á þessu tímabili og skorað 13 mörk í 20 leikjum fyrir Anderlect. Nánast hver einasti stóri klúbbur í Evrópu fylgist með framgöngu þessa leikmanns en nú er talið að City muni gera tilboð í þessum mánuði.

„Við erum í góðum samskiptum við City en þeir eru aðeins einn klúbbur af mörgum sem hafa spurst fyrir um hann," sagði Christophe Henrotay, umboðsmaður Lukaku.

Chelsea og Arsenal hafa lengi verið á eftir þessum stórefnilega leikmanni og sjálfur hefur Lukaku sagst vilja leika í Englandi. Hann hefur stutt Chelsea frá unga aldri og verður spennandi að sjá hvaða lið hefur betur í baráttunni um leikmanninn.