Vieira: City á Tevez mikið að þakka

Patrick Vieira, fyrrum leikmaður Manchester City og nú einn yfirmaður knattspyrnumála hjá félaginu, segir að félagið eigi þrátt fyrir allt Carlos Tevez mikið að þakka.

Það hefur gengið á ýmsu hjá Tevez síðustu vikurnar eftir að hann neitaði að koma inn á sem varamaður í leik liðsins gegn Bayern München í Meistaradeild Evrópu. Á dögunum fór hann í leyfisleysi til Argentínu og verður að teljast ólíklegt að hann eigi eftir að spila fyrir félagið á ný.

„Ég held að það sé mjög erfitt að tjá sig að miklu leyti um mál Tevez því rannsóknin er enn í fullum gangi og ég tel það ekki við hæfi að blanda sér í málið,“ sagði Vieira í samtali við enska fjölmiðla.

„En ég tel að félagið eigi Carlos mikið að þakka. Liðið væri annars ekki á þeim stað þar sem það er í dag, hefði hann ekki lagt sitt af mörkum. Carlos skoraði mikið á síðasta tímabili og hefur reynst liðinu afar vel.“

City er nú á toppi ensku úrvalsdeildarinnar með fimm stiga forystu. Vieira segir að leikmenn eigi hrós skilið. „Þeir hafa verið að leggja á sig mikla vinnu, allir sem einn. Sóknarmennirnir hafa verið öflugir, þeir Edin Dzeko, Sergio Agüero og Mario Balotelli, og hafa skorað mikið af mörkum.“