Flóð á flóð ofan úti um allan heim

Um 200 manns, sem fórust í flóðunum í Brasilíu á miðvikudag, voru jarðsettir í gær í bænum Teresopolis.  Búist er við að tugir manna verði jarðsettir í viðbót í dag, og svo er reiknað með að á morgun verði um 300 manns jarðsungnir í þessum 150 þúsund manna bæ í fjallahéruðunum fyrir ofan Rio de Janeiro.

„Við munum finna pláss. Við verðum að gera það,“ segir Vitor da Costa Soares, umsjónarmaður kirkjugarðsins í Teresopolis. „Við verðum hér til klukkan tíu í kvöld, til miðnættis ef við getum. Og svo verðum við mættir aftur klukkan sex í fyrramálið.“

Vitað var um rúmlega 500 manns sem fórust í flóðunum og aurskriðum á þessum slóðum snemma á miðvikudagsmorgun. Fjöldi fólks var sofandi í rúmum sínum þegar skriðurnar komu úr fjöllunum.

Í afskekktu hverfi borgarinnar hafa íbúarnir að mestu sjálfir þurft að grafa eftir fólki í aurnum, því engin leið er að komast þangað nema yfir margra kílómetra langt eðjuflæmi.

Mikil flóð hafa verið víðar í heiminum síðustu daga. Flóðin miklu í Queensland í Ástralíu eru í rénun og hafa valdið miklu eignatjóni, ekki síst í borginni Brisbane og landbúnaðarhéruðunum þar í kring.

Bændur í Ástralíu höfðu vonast eftir góðri uppskeru í ár til að bæta upp það tjón sem varð í þurrkunum miklu á síðasta ári.

Flóðin undanfarnar vikur í Ástralíu hafa kostað að minnsta kosti 26 manns lífið, en um 50 manns að auki er saknað.

Á Srí Lanka hafa tugir manna farist í flóðum síðustu daga og flóð hafa einnig verið víða í Evrópu nú í vikunni. Í sunnanverðu Þýskalandi hafa flóð valdið miklum skemmdum og lamað samgöngur.

Mörg þorp á Srí Lanka eru enn í hálfu kafi eftir flóðin og sums staðar hefur ekki tekist að koma neyðarhjálp til íbúanna. Óttast er að sjúkdómar breiðist út, meðal annars vegna þess að skolpleiðslur yfirfyllast og vatnsbrunnar mengast.

Ljóst er að sjúkrahús á Srí Lanka ráða ekki öll við það ef faraldur brýst út. Hópar lækna og hjúkrunarfólks hafa verið sendir út af örkinni til að setja upp sjúkraskýli á flóðasvæðunum.

gudsteinn@frettabladid.is