Bylting í bílaiðnaði væntanleg

Um helgina kynntu talsmenn Bandaríska tæknifyrirtækisins MVS forrit sem þeir telja að eigi eftir að bylta bílaiðnaðinum. Forritið samhæfir upplýsingar frá GPS gervihnöttum og internetinu og varpar þeim á bílrúður ökutækja.

Forritið er kallað True3D og hefur verið lengi í þróun. En þó svo að tæknin sé spáný þá er hugmyndin gömul. Í vísindaskáldskap hafa bílrúður ökutækja oft á tíðum miðlað upplýsingum til bílstjóra en stjórnendur telja MVS að mikil þörf væri á slíkum búnaði í bílum.

Talsmenn MVS segja að forritið breyti bílrúðunni í risavaxinn tölvuskjá. Þeir telja að forritið bjóði upp á meira öryggi í umferðinni með því að birta áhættumerki, leiðbeiningar ásamt upplýsingum um veðurfar og ástand farartækisins.

Ekki er vitað hvenær True3D verði orðið að staðalbúnaði í ökutækjum en bílaframleiðandinn Toyota hefur þegar hafið tilraunir með forritið.