Bannan settur í bann hjá Villa

Barry Bannan hefur verið settur í tímabundið bann hjá félagi sínu, Aston Villa, á meðan rannsókn á meintum ölvunarakstri Bannan stendur yfir.

Bannan var handtekinn á sunnudagsmorgun ásamt öðrum knattspyrnukappa, James Collins hjá Shrewsbury og fyrrum leikmanni Villa, eftir að þeir lentu í árekstri.

Alex McLeish, stjóri Aston Villa, tilkynnti í gær að félagið hafi sett af stað rannsókn á málinu og hefur nú bætt við að Bannan hafi verið settur í tímabundið bann.

„Hann mun því ekki spila um helgina gegn Sunderland,“ sagði McLeish en Bannan, sem er aðeins 21 árs gamall, er einn efnilegasti leikmaður félagsins sem og skoska landsliðsins.