Terry að berjast fyrir landsliðsferlinum - heyrði Ferdinand ekki í honum?

John Terry gæti misst fyrirliðabandið sitt hjá enska landsliðinu enn á ný og jafnvel sæti sitt í liðinu reynist ásakanir um kynþáttaníð á rökum reistar.

Málið hefur fengið mikla umfjöllun í Englandi síðustu daga en Terry er gefið að sök að hafa notað niðrandi orð um Anton Ferdinand í leik Chelsea og QPR um helgina og beitt hann kynþáttaníði.

Terry hefur áður þurft að glíma við ýmis áberandi mál, svo sem drykkjulæti og framhjáhald. Hann missti um tíma fyrirliðabandið í enska landsliðinu eftir að framhjáhald hans komst upp en Fabio Capelli, landsliðþjálfari Englands, gerði hann aftur að fyrirliða eftir HM 2010 í sumar.

Síðan þá hefur Terry greint frá því að hann dreymir um að leiða enska landsliðið til afreka á EM 2012 í sumar en nú getur vel verið að ekkert verði af því.

Sjálfur hefur Terry ítrekað sagt að hann hafi ekki gert það sem honum er gefið að sök. Um miskilning sé að ræða og hann hafi útkljáð sín mál við Anton Ferdinand eftir leikinn.

Enska knattspyrnusambandið er nú að rannsaka atvikið sem og lögreglan í Lundúnum eftir að ábendingar bárust frá almenningi.

Nú er talið að Ferdinand hafi ekki heyrt þegar að Terry hafi kallað hann þeim nöfnum sem myndbandsupptökur virðast sýna. Þeir hafi rætt saman eftir leikinn en þegar að Ferdinand sjá sjálfur upptökurnar hafi hann fyrst áttað sig á hvað hafði gengið á.

Það mun því ráðast að miklu leyti hver hans framburður verður í málinu og miðað við umfjöllun ensku pressunar, sem vill oft vera öfgakennd, er ljóst að framtíð Terry með enska landsliðinu hangir á bláþræði.