Steven Gerrard vill endilega að Dalglish haldi áfram

Steven Gerrard, fyrirliði Liverpool, vill endilega að Kenny Dalglish verði áfram stjóri félagsins eftir þetta tímabil en Dalglish tók tímabundið við liðinu eftir að Roy Hodgson var rekinn á dögunum.

Gerrard fékk rauða spjaldið eftir hálftíma í fyrsta leiknum undir stjórn Dalglish og hefur misst af síðustu tveimur leikjum vegna leikbanns. Hann verður heldur ekki með á móti Wolverhampton Wanderers um helgina.

„Það væri ekkert betra en ef að við enduðum tímabilið vel og að góð úrslit myndu tryggja það að Kenny yrði ráðinn áfram. Þetta er skammtímamarkmið mitt og ég ætla að gefa allt mitt til þess að við náum því," sagði Steven Gerrard

„Ég ætla ekki að ljúga því, að þegar Kenny hringdi í mig til þess að segja mér að hann væri að taka við, þá var það mikil vítamínssprauta. Ég kann mjög vel við hann persónulega og ég notið þess að vinna með honum þessa fyrstu daga. Ég sé fyrir mér jákvæða framtíð hjá Kenny hjá þessu félagi," sagði Steven Gerrard.

„Hann er hinn fullkomni maður til þess að koma Liverpool-liðinu af stað í rétta átt. Gælunafnið hans, Kóngurinn Kenny, segir allt sem segja þarf," sagði Gerrard.