Wenger: Denilson og Fabregas eru mjög góðir vinir

Arsene Wenger, stjóri Arsenal, segir ekkert vera til í því að leikmennirnir Cesc Fabregas og Denilson eigi í einhverjum innbyrðisdeilum. Viðtal við Denilson birtist í brasilsíkum netmiðlum þar sem Denilson sagði meðal annars að Fabregas væri enginn leiðtogi.

„Þessi frétt kemur frá Brasilíu og það er ekki haft rétt eftir honum. Þarna voru á ferðinni annaðhvort lélegir þýðendur eða góðir þýðendur með slæman ásetning," sagði Arsene Wenger.

„Denilson og Fabregas eru mjög góðir vinir og bera mikla virðingu fyrir hvorum öðrum. Cesc er fyrirliðinn okkar, Robin van Persie er varafyrirliðinn og við erum með marga leiðtoga í okkar liði," sagði Wenger.

„Það eru margir með leiðtogahlutverk í okkar liði. Ég trúi því að Fabregas sér frábær leiðtogi ekki síst þegar menn átta sig á því að hann er bara 23 ára gamall. Það er mikilvægt í okkar leikstíl að allir í liðinu taki á sig ábyrgð," sagði Wenger.

Denilson segist hafa talað við Fabregas og allt sé í góðu á milli þeirra.