Torres með tvö mörk í fyrsta sigri Liverpool undir stjórn Dalglish

Liverpool vann 3-0 útisigur á Wolves í hádegisleiknum í ensku úrvalsdeildinni og hoppaði með því upp í 10. sæti deildarinnar. Þetta var fyrsti sigur liðsins undir stjórn Kenny Dalglish og aðeins annar útisigur liðsins á tímabilinu.

Fernando Torres skoraði tvö mörk í leiknum og Portúgalinn Raul Meireles átti flottan leik, skoraði eitt glæsilegt mark og lagði upp það fyrsta. Sigur Liverpool var sanngjarn en kannski heldur of stór því Wolves-liðið barðist vel í þessum leik.

Fernando Torres fékk dauðfæri áður en hann kom Liverpool í 1-0 með marki á 36. mínútu. Christian Poulsen átti góða stungusendingu á Raul Meireles sem hann lagði hann fyrir markið þar sem Torres átti auðvelt með að skora í autt markið. Úlfarnir vildu frá rangstöðu en endursýningar sýndu að Meireles var réttlega dæmdur réttstæður.

Raul Meireles kom Liverpool í 2-0 á 50. mínútu með glæsilegu viðstöðulausu skoti af um 25 metra færi sem var óverjandi fyrir Wayne Hennessey markvörð Wolves. Fernando Torres innsiglaði síðan sigurinn í uppbótartíma eftir að hafa fengið boltann eftir upphlaup Hollendingsins Dirk Kyut.

Þetta var fjórði leikur Liverpool undir stjórn Kenny Dalglish en áður hafði liðið tapað fyrir Manchester United (bikar) og Blackpool og gert jafntefli við Everton.