Heimir: Engin flugeldasýning en nægir yfirburðir til að sigra

Heimir Hallgrímsson þjálfari Eyjamanna var sáttur í leikslok eftir 0-2 sigur á Frömurum. Framundan eru erfiðir leikir hjá liðinu auk þess sem þjóðhátíð í eyjunni er á næsta leiti og því nóg um að vera hjá Eyjamönnum.

„Þetta var kannski engin flugeldasýning en yfirburðirnir voru nægir til þess að vinna þennan leik 2-0. Þeir sköpuðu sér engin dauðafæri gegn okkur. Leikurinn hjá okkur var öruggur en kannski ekkert brjálæðislega skemmtilegur“

Aaron Spear 18 ára lánsmaður frá Newcastle kom beint inn í byrjunarlið ÍBV í leiknum og var Heimir sáttur með nýliðann.

„Hann er á 2 flokks aldri og mun eflaust eitthvað spila með þeim en ef hann stendur sig vel þá mun hann frekar spila með okkur. Hann kom fínt inn í þetta er með fína tækni og með flottan hraða en auðvitað á hann eftir að komast betur inn í þetta enda einungis verið með okkur á tveimur æfingum.„

Aðspurður um undanúrslitaleik í bikar framundan hafði Heimir þetta að segja.

„Liðið er í fínu standi og við verðum að hugsa vel um okkur. Framundan er bikarleikur gegn Þór og þeir eru á miklu flugi og það verður erfiður leikur. Við hlökkum til að taka á Þórsurum og um leið berum við mikla virðingu fyrir þeirra liði og þeirra frábæru stuðningsmönnum.“

Að  lokum hafði Heimir þetta að segja um þau hátíðarhöld sem bíða Eyjamanna.

„Það eru allir velkomnir á þjóðhátið og við ætlum að hugsa vel um okkur um helgina því það eru stórir leikir strax eftir Verzlunarmannahelgina.“