Wenger: Fer enginn frá Arsenal í janúar

Arsene Wenger, stjóri Arsenal, hefur útilokað að félagið muni leyfa einhverjum leikmanni að fara nú í félagaskiptaglugganum í janúar.

Markvörðurinn Manuel Almunia hefur helst verið sagður á leið frá félaginu og þá hefur Andrey Arshavin einnig verið orðaður við önnur félög.

„Það kemur ekki til greina eins og er enda margir mikilvægir leikir fram undan. Við þurfum að geta kallað í alla okkar leikmenn," sagði Wenger.

Liðið mætir West Ham í ensku úrvalsdeildinni um helgina og á Wenger von á erfiðum leik.

„Það eru aðeins tvö eða þrjú stig sem skilja að liðin í átta neðstu sætunum og er það aðeins einn sigurleikur," sagði hann en West Ham er sem stendur í neðsta sæti deildarinnar.

„Það er ekki hægt að fullyrða neitt um liðin út frá stöðu þeirra í deildinni. Hún er mjög jöfn og það gerir þetta svona spennandi. Hver leikur verður fyrir vikið afar athyglisverður."