Innlent

Hróarskelda velur íslenskt hugvit til að fanga stemmninguna

Valur Grettisson skrifar
Skjámynd af Liveproject.is
Skjámynd af Liveproject.is
„Við erum rosa ánægðir með þetta og vonum bara að þetta verði vinsælt," segir hönnuðurinn Hörður Kristbjörnsson, en hann, ásamt félögum sínum, halda úti myndavefnum liveproject.is. Þeir gerðu nýlega samning við Hróarskelduhátíðina um að birta myndir og myndbönd frá hátíðinni.

Á hverju ári mæta hátt í hundrað þúsund gestir á Hróarskeldu sem er ein vinsælasta tónlistarhátíð heims. Gestir hátíðarinnar geta nýtt vefinn með því að senda inn myndbönd og myndir úr símum sínum og vefurinn birtir efnið samstundis.

Vefurinn var í raun stofnaður á síðasta ári og er í ætt við Youtube. Munurinn er þó töluverður eins og sjá má ef farið er inn á vefinn. Að auki er markmið vefjarins eingöngu að sýna frá ákveðnum viðburðum.

„Það geta allir sent myndbönd inn á vefinn. Þannig endurspeglar hann stemmninguna á hátíðinni," segir Hörður um samstarfið við hátíðina.

Áður hefur vefurinn sýnt frá viðburðum eins og Airwaves og tískuhátíðinni í Reykjavík. Síðast sýndu þeir frá snjóbrettamóti á Akureyri.

Hörður Kristbjörnsson.
Samstarfið við Hróarskeldu er gríðarlega verðmætt enda tug þúsundir manna á hátíðinni og má búast við öðrum eins fjölda heimsókna á heimasíðuna á meðan hátíðinni stendur. Því er um ómetanlega fjölþjóðlega kynningu að ræða fyrir þennan einstaka vef.

Hörður segir að ein stærsta áskorunin við að takast á við svona stórt verkefni sé sú að taka á móti allri þeirri netumferð sem á eftir að fara um vefinn. Þannig þola vefir bara ákveðna umferð eins og netnotendur hafa sennilega oft upplifað.

„Það verður rosalega vinna að takast á við alla umferðina. Við erum einmitt búnir að vinna hörðum höndum að því að baktryggja okkur í þeim efnum," segir Hörður sem fer sjálfur á hátíðina þar sem hann ásamt samstarfsfélögum munu einnig vinna innslög inn á vefinn.

Auk Harðar koma þeir Benedikt Freyr Jónsson og Daníel Atlason að vefnum. Þá njóta þeir liðsinnis forritarans Arnars.

„Svo er auðvitað fullt af fólki sem hefur lagt okkur lið í þessu," segir Hörður en Síminn hefur meðal annars verið mjög sterkur samstarfsaðili þeirra félaga og styrktaraðili í þróun og vinnu við verkefnið. 

Hér er hægt að nálgast vefinn en Hróarskelduhátíðin fer fram fyrstu vikuna í júlí.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×