Benitez: Þetta mun ganga betur hjá Liverpool með Dalglish

Rafael Benitez, fyrrum stjóri Liverpool, segir gamla félagið sitt hafa tekið rétt ákvörðun með að ráða Kenny Dalglish sem stjóra eftir að Roy Hodgson var rekinn frá félaginu.

„Þetta mun ganga betur hjá Liverpool með Dalglish því hann þekkir félagið vel og veit hvað stuðningsmennirnir vilja," sagði Rafael Benitez við BBC. Dalglish vann átta meistaratitla sem leikmaður eða stjóri Liverpool frá 1977 til 1991.

„Hann getur talað við leikmennina og þá munu þeir gera sér betur grein fyrir því hvað það þýðir að vera leikmaður Liverpool. Ég tel að það hafi verið hárrétt að ráða Dalglish og vonandi mun þetta ganga vel hjá honum," sagði Benitez sem var stjóri Liverpool í sex ár.