Harry Redknapp rændur á fótboltaleik í Madríd

Harry Redknapp, stjóri Tottenham, hefur sagt frá óskemmtilegri lífsreynslu sinni þegar hann fór til Spánar á fimmtudaginn til þess að fylgjast með nágrannaslag Real Madrid og Atletico Madrid í spænska bikarnum. Redknapp var nefnilega rændur á vellinum en hann var þar að fylgjast með Úrúgvæanum Diego Forlon.

Redknapp sagði að tveir menn höfðu lagst á hnén fyrir framan hann og togað í buxurnar til þess að dreifa athygli hans á meðan fjórir aðrir komu aftan að honum og rændu peningum og öllu lauslegu úr vösum hans.

„Þeir tóku allt, allan peninginn minn, kreditkortin og allt. Þeir vissu örugglega ekki hver ég var og ég leit örugglega heimskulega út. Þeir hafa hugsað með sér að þarna hafi verið einn sem var ekki spænskur," sagði Harry Redknapp.

Redknapp var á gangi fyrir utan völlinn þegar hann var rændur en áttaði sig ekki á því fyrr en of seint að allt var farið úr vösunum. Redknapp sagðist hafa farið af vellinum fimmtán mínútum fyrir leikslok ekki síst vegna þessa leiðinlega atviks.

Redknapp tók þá ákvörðun að kæra ekki þjófnaðinn til lögreglunnar en sagðist hafa þurft að fá lánaðan pening frá aðstoðarstjóra sínum Kevin Bond fyrir bæði leigubíl og mat um kvöldið.