Tottenham og Liverpool berjast um Luis Suárez

Úrúgvæinn Luis Suárez er líklega á leiðinni í ensku úrvalsdeildina ef marka má nýjustu fréttir enskra miðla. Guardian segir frá því að Tottenham og Liverpool séu bæði spennt fyrir því að kaupa framherjann frá hollenska liðinu Ajax.

Liverpool hefur verið að fylgjast með Suárez síðan í ágúst en hann sló í gegn með landsliði Úrúgvæ á HM í Suður-Afríku síðasta sumar. Suárez er víst mjög áhugasamur fyrir því að fá að spila við hlið Fernando Torres í framlínunni á Anfield.

Tottenham hefur einnig verið að kynna sér möguleikana á því að kaupa Luis Suárez en verðmiðinn gæti verið í kringum fimmtán milljónir punda. Suárez er 23 ára og 181 sm framherji sem hefur spilað með Ajax frá árinu 2007.

Frank de Boer, þjálfari Ajax, segir að leikmaðurinn vilji komast í sterkari deild og fá betri laun en Ajax er að borga honum 1,75 milljónir punda í árslaun.

Suárez var líka ósáttur við forráðamenn Ajax að gera enga athugasemd við það þegar hann var dæmdur í sjö leikja bann í nóvember. Suárez beit þá einn leikmanna PSV Eindhoven. Hann var heldur ekki sáttur við það þegar Martin Jol hætti sem þjálfari Ajax í síðasta mánuði.

Luis Suárez er búinn að skora 81 mark í 108 leikjum í hollensku deildinni en hann hefur skorað 7 mörk í 13 leikjum á þessu tímabili eftir að hafa skorað 35 mörk í 33 leikjum á síðustu leiktíð.