Wenger hefur áhuga á Hazard

Arsene Wenger, knattspyrnustjóri Arsenal, hefur viðurkennt í franska sjónvarpsþættinum Telefoot að hann hafi áhuga á leikmanninum Eden Hazard sem leikur með Lille í frönsku úrvalsdeildinni.

„Hann er leikmaður sem ég hef fylgst með í nokkurn tíma en ég vil ekki koma Lille úr jafnvægi á þessum tímapunkti. Þegar hann verður til sölu þá mun ég skoða kaup á honum," sagði Wenger sem þykir ekki líklegur til að taka upp veskið í janúar.

Hinn tvítugi Hazard kemur frá Belgíu og er einn eftirsóttasti leikmaðurinn í Evrópu. Öll stærstu liðin í Evrópu eru á höttunum eftir starfskröftum hans.

Fréttir herma einnig að Arsenal sé nálægt því að ganga frá kaupum á enska undrabarninu Alex Oxlade-Chamberlain frá Southampton. Kaupverð er talið vera um tíu milljónir punda.