Surez heillaður af enska boltanum

Luis Suarez frá Úrúgvæ er meira en til í að færa sig um set til Englands. Hann leikur nú með hollenska liðinu Ajax en Liverpool er meðal þeirra liða sem eru talin á höttunum eftir leikmanninum.

„Enska deildin heillar mig og þarna er leikinn mjög góður fótbolti," segir hinn 23 ára Suarez sem komst í fréttirnar í haust fyrir að bíta andstæðing sinn í hollensku deildinni og hefur fengið viðurnefnið mannætan í kjölfarið.

„Ég hélt einu sinni að enski boltinn myndi ekki henta mér. Þegar ég sá Tevez leika í Argentínu þá átti ég ekki von á því að sjá hann í ensku úrvalsdeildinni en ef honum gengur vel þá er þetta deild sem hentar mér einnig."

Búast má við að Suarez fari frá Ajax í janúar eða í sumar. Líklegt er að England verði hans næsti viðkomustaður en hann sló í gegn með liði Úrúgvæ á HM í sumar.