Blackpool hafnaði tilboði Liverpool í Charlie Adam

Blackpool mun hafa hafnað tilboði upp á fjórar milljónir punda frá Liverpool í miðvallarleikmanninn Charlie Adam.

Adam hefur verið eftirsóttur undanfarnar vikur og hafnaði félagið fyrr í mánuðinum tilboði Aston Villa í Adam upp á 3,5 milljónir punda. Ian Holloway, stjóri Blackpool, sagði tilboðið hafa verið móðgandi.

Adam er 25 ára gamall Skoti sem hefur slegið í gegn í ensku úrvalsdeildinni með spútnikliði Blackpool í vetur.

Hann hefur skorað fjögur mörk til þessa á tímabilinu og situr Blackpool í tíunda sæti deildarinnar sem stendur.