Leiðtogi uppreisnarmanna staðfestir fall Gaddafís

Forsætisráðherra bráðabirgðarstjórnarinnar í Líbíu hefur nú staðfest að Múammar Gaddafí, einræðisherra landsins til fjörutíu ára, hafi verið skotinn til bana fyrir utan bæinn Sirte í dag. Mahmoud Jibril starfandi forsætisráðherra landsins hélt blaðamannafund í höfuðborginni Trípólí þar sem hann staðfesti fréttirnar og sagði hann um leið að nú væri tími til kominn að koma á fót nýrri sameinaðri Líbíu.

Gaddafí reyndi að flýja frá borginni Sirte í morgun rétt áður en uppreisnarmenn náðu fullu valdi á borginni, sem hefur verið helsta vígi einræðisherrans fyrrverandi síðustu vikur. Herþotur NATO gerður árás á bílalestina sem hann var í og náðu uppreisnarmenn honum skammt frá. Myndir og myndbönd af líkinu hafa nú farið sem eldur í sinu um heiminn og fljótlega eftir að fréttir tóku að berast af falli einræðisherrans brutust út mikil fagnaðarlæti víðsvegar um Líbíu.