Meireles elskar að spila fyrir Dalglish

Portúgalinn Raul Meireles, miðvallaleikmaður Liverpool, elskar að leika fyrir knattspyrnustjórann Kenny Dalglish.

Þessi 27 ára leikmaður hefur verið iðinn við kolann í markaskorun að undanförnu og segist fá meira traust hjá Dalglish en fyrrum stjóra liðsins, Roy Hodgson, sem keypti hann í sumar.

„Ég veit ekki af hverju en ég held að Hodgson hafi ekki verið sérstaklega vel við mig. Dalglish er nánari leikmönnum og talar meira við okkur á æfingum. Sambandið á milli leikmanna og þjálfara er beinna. Hodgson er þjálfari af gamla skólanum og bar virðingu fyrir leikmönnum. Meiðsli og slæm byrjun á tímabilinu eyðilagði vinnuna með honum," segir Meireles.

Portúgalinn skotvissi var keyptur til Liverpool á 11,5 milljónir punda í sumar frá Porto og hefur slegið í gegn meðal stuðningsmanna Liverpool sem mætir West Ham í ensku deildinni í dag.