Damanaki boðar minni miðstýringu

Maria Damanaki, sjávarútvegsstjóri ESB, leggur mikla áherslu á að draga úr miðstýringu við endurskoðun sameiginlegrar sjávarútvegsstefnu sambandsins.

Í ræðu sem hún hélt í Dyflinni á dögunum, og vefurinn fishnews.eu segir frá, fór hún yfir hina ýmsu ágalla sem eru á núverandi löggjöf, meðal annars óhagkvæmni sem felst til dæmis í brottkasti og banni á framsali aflaheimilda.

Damanaki sagði einn lykilinn í þessum málum vera að færa ákvarðanatöku frá Brussel til aðildarríkjanna.

„Það sem skiptir máli hjá okkur er hvort markmiðum sé náð, en ekki hvernig,“ sagði hún.

Þannig geti markmiðið til dæmis verið að nýta staðbundna stofna með sjálfbærum hætti, en í stað þess að nákvæmar reglur komi að ofan, nýti aðildarríkin sérþekkingu og reynslu innlendra aðila til að ná settu marki.

Tillögur framkvæmdastjórnar ESB um breytingar á fiskveiðistefnunni eru nú til meðferðar hjá ráðherraráði sambandsins og er vonast til þess að ný stefna taki gildi árið 2013.- þj