Fjögurra ára sænskur drengur myrtur

Lögreglan í Ljungby í Svíþjóð hefur nú staðfest að fjögurra ára gamall drengur sem fannst látinn í nágrenni við leikvöll í gærkvöldi var myrtur. Drengurinn hvarf af leikvellinum síðdegis í gær og um kvöldmatarleytið var lýst eftir honum af lögreglu. Víðtæk leit fór í gang og stuttu síðar fundu sjálfboðaliðar sem þátt tóku í leitinni lík hans.

Drengurinn hafði hlaupið í burtu frá fjölskyldu sinni eftir að hann lenti í rifrildi við systkini sitt. Lögreglan tjáir sig ekki um hve langt hann hafði farið áður en hann lést. Víðtæk rannsókn hefur nú verið sett í gang til þess að leysa málið sem fyrst en á þessari stundu er enginn grunaður um verknaðinn. Fjölskylda drengsins hafði fyrr í sumar verið undir eftirliti frá barnaverndaryfirvöldum í bænum.