Villas-Boas: Terry ekki annars hugar

Andre Villas-Boas, stjóri Chelsea, sagði eftir tap sinna manna gegn Arsenal í dag að John Terry væri ekki annars hugar vegna mikillar umfjöllunar enskra fjölmiðla um hann í vikunni.

Terry sætir nú rannsókn bæði lögreglunnar í Lundúnum sem og enska knattspyrnusambandsins vegna ásakana um að hann hafi beitt Anton Ferdinand, leikmann QPR, kynþáttaníði í leik liðanna um síðustu helgi.

Terry hefur staðfastlega neitað sök og hann var á sínum stað í vörn Chelsea sem fékk á sig fimm mörk í dag. Terry skoraði að vísu mark í leiknum en gerði svo skelfileg mistök í stöðunni 3-3 sem gerði Robin van Persie að koma Arsenal 4-3 yfir. Leiknum lyktaði svo með 5-3 sigri Arsenal.

„Hefur ástandið haft áhrif á John? Nei, alls ekki,“ sagði Villas-Boas eftir leikinn í kvöld. „Ég tel ekki að þetta mál hafi gert það að verkum að hann var annars hugar í dag. Ég hef sagt það áður en ég tel að allt þetta sé einfaldlega komið til vegna misskilning.“

„Enska knattspyrnusambandið er að rannsaka málið og við skulum leyfa því að gera það.“