Van der Vaart vill klára ferlinn hjá Tottenham

Hollendingurinn Rafael van der Vaart segist gjarnan vilja spila með Tottenham í ensku úrvalsdeildinni þar til að ferli hans lýkur.

Van der Vaart er 27 ára gamall og hefur verið einn allra besti leikmaður ensku úrvalsdeildarinnar í haust. Hann kom til liðsins í sumar frá Real Madrid fyrir 9,5 milljónir punda.

Hann hefur skorað ellefu mörk til þessa á tímabilinu og á nú eftir þrjú og hálft ár af samningi sínum.

„Ég elska að vera hérna. Ég elska leikmennina og stemninguna hjá félaginu sem er mjög jarðbundin," sagði van der Vaart í samtali við enska fjölmiðla.

„Ef ég fæ tækifæri til þess myndi ég gjarnan vilja vera hérna þar til ferli mínum lýkur."

Spurs mætir Manchester United á sunnudaginn og segir van der Vaart að það sé stærsti leikur tímabilsins í ensku úrvalsdeildinni.

„Ekki bara fyrir Tottenham heldur alla deildina vegna þess að United er enn ósigrað til þessa á tímabilinu. Ef við vinnum United þá verður titilbaráttan galopin."

Hann lofaði einnig David Beckham sem hefur æft með Tottenham síðustu daga. „Ég hef tekið eina æfinga með honum. Það er gaman að hafa hann hjá okkur enda frábær leikmaður og frábær fulltrúi knattspyrnunnar."