Coyle hefur trú á Dalglish

Owen Coyle, stjóri Bolton, hefur trú á því að Kenny Dalglish muni ná að koma Liverpool aftur á beinu brautina í ensku úrvalsdeildinni.

Liverpool hefur tapað fyrstu tveimur leikjum sínum síðan að Roy Hodgson var rekinn um síðustu helgi og Dalglish tók við - fyrir Manchester United og Blackpool.

Coyle hefur sjálfur verið orðaður við Liverpool en samkvæmt núverandi fyrirkomulagi mun Dalglish aðeins stýra liðinu til loka leiktíðarinnar.

„Ég er nú aðeins að einbeita mér að mínu starfi og ætla að sjá til þess að ég leggi mig allan fram í það."

„Kenny mun standa sig mjög vel. Hann elskar knattspyrnu og er frábær gaur. Ég efa ekki að liðinu muni ganga betur á tímabilinu undir hans stjórn."