Balotelli þarf ekki í aðgerð

Mario Balotelli þarf ekki að gangast undir aðgerð vegna hnémeiðsla sinna, samkvæmt því sem umboðsmaður hans segir.

Hann þarf þó að hvíla næsta mánuðinn vegna meiðslanna. Balotelli gekkst fyrr í haust undir aðgerð vegna hnémeiðsla og var hann frá í tvo mánuði vegna þessa.

Balotelli gæti næst spilað þegar að City mætir Manchester United í grannaslag liðanna í febrúar.

„Eins og er þá er hann ekki á leiðinni í aðgerð," sagði umboðsmaðurinn Mino Raiola í samtali við ítalska fjölmiðla.

Raiola útilokað enn fremur að Balotelli sé á leið aftur til Ítalíu í sumar og þá til AC Milan. „Það væri draumur fyrir þá að geta stillt upp Balotelli, Ibrahimovic og Cassano í sókninni en ég efast um að það verði að raunveruleika. Honum líður vel hjá City og ég á von á að hann verði áfram þar."