Dimitar Berbatov og Robin van Persie skoruðu báðir þrennu

Manchester United vann 5-0 sigur á Birmingham í ensku úrvalsdeildinni í dag og er með tveggja stiga forskot á toppnum á Arsenal sem komst upp fyrir Manchester City með 3-0 sigri á Wigan. City getur endurheimt annað sætið þegar liðið mætir Aston Villa á eftir. Aaron Lennon tryggði Tottenham 1-1 jafntefli á móti Newcastle í uppbótartíma.

Manchester United vann sinn áttunda deildarsigur í röð á Old Trafford þegar liðið burstaði Birmingham 5-0 þar sem Dimitar Berbatov var enn á ný í stuði og skoraði þrennu.

Það tók Manchester United aðeins 95 sekúndur að komast yfir á móti Birmingham. Dimitar Berbatov skallaði þá boltann inn af marklínunni eftir að John O'Shea skallaði hornspyrnu Ryan Giggs aftur fyrir sig.

Berbatov bætti við öðru marki á 31. mínútu eftir sendingu Wayne Rooney og Rooney lagði síðan upp annað mark fyrir Giggs í lok hálfleiksins. Berbatov innsiglaði síðan þrennu sína í upphafi seinni hálfleiks eftir sendingu frá Giggs og undirbúning Rooney.

Þetta var þriðja þrenna Búlgarans á tímabilinu og hann er sá fyrsti til að afreka það í ensku úrvalsdeildinni síðan að Ruud van Nistelrooy gerði það tímabilið 2002-2003.

Nani fékk fullt af færum en tókst loksins að skora á 76. mínútu þegar hann skoraði með hnitmiðuðu skoti fyrir utan teig. Manchester United vann því 5-0 stórsigur en sigurinn hefði auðveldlega geta orðið mun stærri.

Robin van Persie skoraði þrennu fyrir Arsenal sem vann 3-0 sigur á Wigan. Fyrsta markið skoraði hann á 21. mínútu eftir sendingu Alexandre Song, annað markið kom á 58. mínútu eftir laglegt samspil við Cesc Fabregas og það þriðja gerði Hollendingurinn á 85. mínútu. Van Persie átti möguleika á því að skora fernu en skaut yfir úr vítaspyrnu á 69. mínútu.



Fabricio Coloccini hélt upp á 29. ára afmælisdaginn með því að koma Newcastle í 1-0 á móti Tottenham á St James' Park en Aaron Lennon skoraði jöfnunarmarkið í uppbótartíma. Tottenham hefur aðeins náð í tvö stig í síðustu þremur leikjum.

Kieran Richardson skoraði bæði mörk Sunderland sem vann 2-1 útisigur á Blackpool en þetta var þriðji sigur liðsins í síðustu fjórum leikjum.



Clint Dempsey skoraði tvö mörk fyrir Fulham sem vann 2-0 sigur á Stoke en Dempsey fiskaði auk þess Ryan Shawcross útaf með rautt spjald á 55. mínútu leiksins.

Frédéric Piquionne virtist vera að tryggja West Ham sigur á Everton á Goodison Park sex mínútum fyrir leikslok en hann fékk sitt annað gula spjald skömmu síðar og Marouane Fellaini tryggði Everton 2-2 jafntefli í blálokin.

Úrslit og markaskorarar í ensku úrvalsdeildinni í dag

Arsenal-Wigan 3-0

1-0 Robin van Persie (21.), 2-0 Robin van Persie (58.), 3-0 Robin van Persie (85.)

Blackpool-Sunderland 1-2

0-1 Kieran Richardson (15.), 0-2 Kieran Richardson (35.), 1-2 Charlie Adam, víti (85.)

Everton-West Ham 2-2

0-1 Jonathan Spector (25.), 1-1 Diniyar Bilyaletdinov (77.), 1-2 Frédéric Piquionne (84.), 2-2 Marouane Fellaini (90.)

Fulham-Stoke 2-0

1-0 Clint Dempsey (33.), 2-0 Clint Dempsey, víti (56.)

Manchester United-Birmingham 5-0

1-0 Dimitar Berbatov (2.), 2-0 Dimitar Berbatov (31.), 3-0 Ryan Giggs (45.+1), 3-0 Dimitar Berbatov (52.), 5-0 Nani (76.)

Newcastle-Tottenham 1-1

1-0 Fabricio Coloccini (59.), 1-1 Aaron Lennon (90.+1)

Wolves-Liverpool 0-3

0-1 Fernando Torres (36.), 0-2 Raúl Meireles (50.), 0-3 Fernando Torres (90.+1)