Hvetja fólk á Íslandi til að mótmæla aftöku fanga

Íslandsdeild Amnesty International hvetur fólk til að mótmæla yfirvofandi aftöku Troy Davis fyrir utan bandaríska sendiráðið klukkan fjögur í dag. Davis var dæmdur til dauða árið 1991 fyrir morð á lögreglumanni og verður tekinn af lífi með banvænni sprautu í fangelsi í Georgíufylki í kvöld.

Hann hefur alltaf haldið fram sakleysi sínu og sjö af níu vitnum, sem dómurinn yfir honum byggði á, hafa dregið framburð sinn til baka. Stuðningsmenn hans hafa bent á að ekkert skotvopn hafi fundist og þá sýna engin DNA-gögn fram á sekt hans.

Hundruð þúsunda manna hafa sýnt Davis stuðning sinn á meðan hann hefur setið á dauðadeild og krafist þess að hann yrði ekki tekinn af lífi.

Hann verður tekinn af lífi á miðnætti á íslenskum tíma.