Chelsea vann Fulham í vítakeppni þrátt fyrir að Lampard hafi klikkað

Chelsea komst áfram í kvöld í enska deildarbikarnum eftir 4-3 sigur á Fulham eftir vítakeppni í leik liðanna á Stamford Bridge í 3. umferð keppninnar. Cardiff City vann Leicester City líka í vítakeppni og Phil Neville tryggði Everton sigur á West Bromwich Albion í framlengingu.

Chelsea-menn léku manni færri í 72 mínútur á móti Fulham eftir að Alex var rekinn útaf en Fulham klikkaði á vítinu sem dæmt var á Alex. Ekkert mark var skorað í venjulegum leiktíma eða framlengingu og Chelsea vann síðan vítakeppnina þrátt fyrir að Frank Lampard hafi látið Mark Schwarzer verja frá sér fyrstu spyrnu Chelsea.

Chelsea-menn skoruðu úr fjórum síðustu spyrnum sínum en Fulham klikkaði á tveimur. Ross Turnbull varði þriðju spyrnu Fulham frá Moussa Dembélé og John Ruiz skaut síðan í slána í síðustu spyrnu Fulham-manna.

Chelsea lék manni færri frá því í upphafi seinni hálfleiks. Alex fékk rauða spjaldið og dæmt á sig víti fyrir að brjóta á Kerim Frei á 48. mínútu en Pajtim Kasami klikkaði á vítaspyrnunni. Það var á endanum ekkert skorað í venjulegum leiktíma og framlengingu og því varð að grípa til vítaspyrnukeppni.

Phil Neville tryggði Everton 2-1 sigur á West Bromwich Albion á Goodison Park þegar hann skoraði sigurmarkið á 103. mínútu eftir sendingu frá Royston Drenthe. Marouane Fellaini hafði tryggt Everton framlengingu með því að jafna metin mínútu fyrir leikslok.



Úrslit og markaskorarar í enska deildarbikarnum í kvöld:

Brighton & Hove Albion - Liverpool    1-2

0-1 Craig Bellamy (7.), 0-2 Dirk Kuyt (81.), 1-2 Ashley Barnes, víti (90.)

Cardiff City - Leicester City    2-2 (2-2, framlengt) Cardiff vann 7-6 í vítakeppni

1-0 Don Cowie (33.), 1-1 Steve Howard (40.), 1-2 Lloyd Dyer (66.), 2-2 Rudy Gestede (82.)

Chelsea - Fulham    0-0 (0-0, framlengt) Chelsea vann 4-3 í vítakeppni

Manchester City - Birmingham    2-0

1-0 Owen Hargreaves (17.), 2-0 Mario Balotelli (38.)

Southampton - Preston North End    2-1

1-0 Jos Hooiveld (27.), 1-1 Adam Barton (51.), 2-1 Adam Lallana (70.)

Everton - West Bromwich    2-1 (1-1, framlengt)

0-1 Chris Brunt (57.), 1-1 Marouane Fellaini (89.), 2-1 Phil Neville (103.)