Stoke stöðvaði sigurgöngu Manchester United

Manchester United gerði 1-1 jafntefli gegn Stoke í síðdegisleiknum í ensku úrvalsdeildinni. Stigið dugar liðinu til að komast í toppsætið með betri markatölu en grannarnir í City. Liðið var án Wayne Rooney auk þess sem Chicharito meiddist snemma leiks og var skipt af velli.

Gestirnir, sem spiluðu án Wayne Rooney sem glímir við meiðsli aftan í læri, urðu fyrir áfalli strax á annarri mínútu leiksins. Þá vildu þeir fá vítaspyrnu og líklega rautt spjald á Jonathan Woodgate fyrir brot á Javier Hernandez sem var sloppinn einn í gegn. Ekkert var dæmt og Hernandez var borinn af velli meiddur. Michael Owen kom inná í hans stað.

Englandsmeistararnir náðu forystunni á 27. mínútu. Þá skoraði Nani fallegt mark með vinstri fæti eftir laglegt samspil við Skotann Darren Fletcher. Portúgalinn skoraði glæsilegt mark gegn Chelsea í síðustu umferð og er sjóðandi heitur.

Heimamenn jöfnuðu metin á 52. mínútu með marki eftir fast leikatriði. Þá sneri Matthew Etherington boltann inná teiginn úr hornspyrnu þar sem Peter Crouch stangaði knöttinn í netið. Phil Jones, varnarmaður United, gleymdi sér í dekkningunni og De Gea hreyfði sig ekki af marklínunni.

Bæði lið fengu færi til þess að tryggja sér sigurinn, Ryan Giggs líklega það besta, en tókst ekki. Jafntefli niðurstaðan og Stoke heldur áfram að hirða stig af stóru liðunum á heimavelli sínum. Liverpool, Chelsea og United hafa öll tapað stigum í Stoke í vetur.

Manchester United er með 16 stig í toppsæti deildarinnar líkt og grannarnir í City en með betra markahlutfall.

Peter Crouch, sem gekk til liðs við Stoke undir lok félagaskiptagluggans frá Tottenham, varð sjötti leikmaðurinn til þess að skora fyrir sex mismunandi úrvalsdeildarfélög.

Staðan í ensku úrvalsdeildinni.