Reynslusaga úr bjarnarkjafti

Hópur breskra barna á skólaferðalagi á Svalbarða varð fyrir árás ísbjarnar nú fyrr í mánuðinum. Patrick Flinders, 16 ára strákur, sem tókst á við björninn með berum höndum kom fram í viðtali í gær og sagði ítarlega frá atburðunum.

Björninn réðist inn í tjaldbúðir nemendanna aðfaranótt 15. ágúst, særði nokkra og drap einn þeirra. Sérstakir vírar og viðbúnaður sem hannaður var til að hræða birni burt virkaði ekki þegar á hólminn var komið. Talið er að búnaðurinn hafi verið rangt upp settur.

Patrick segist snemma hafa tekið eftir því að leiðsögumennirnir sem stjórnuðu ferðalaginu bjuggu ekki yfir nægilegri reynslu til að stýra slíkri ferð. Hvorugur leiðsögumannanna hafði áður séð ísbjörn.

Patrick deildi tjaldi með Horatio Chapple, 17 ára strák sem lét lífið í árásinni. Patrick segir frá því hvernig tjaldið hans féll skyndilega saman undan gríðarlegum þunga. Hann horfði á þegar björninn greip hönd annars leiðsögumannsins í kjaftinn, eftir að byssa klikkaði og hleypti ekki af í fjögur skipti.

Þá sneri björninn sér að Patrick með trýnið atað í blóði. „Ég hélt ég myndi deyja og lokaði augunum þéttingsfast," segir Patrick. Það næsta sem hann vissi var að björninn hafði höfuð hans í kjaftinum. Hann barðist um á hæl og hnakka og sló björninn í höfuðið í örvæntingarfullri tilraun til að sleppa meðan hann „heyrði höfuðkúpu sína bresta". Hann neitar því að vera hetja, segist aðeins hafa kýlt björninn því hann var að „slást um líf mitt". Skurðlæknar fundu brot úr tönnum bjarnarins í höfuðleðri Patrick þegar þeir reyndu að tjasla honum saman, en Patrick er með mikil sár á höfði og skakkt auga.

Að lokum tókst leiðangursstjóranum að skjóta björninn og drepa hann. Faðir Patrick skoðar nú möguleikan á málsókn á hendur þeim sem skipulögðu leiðangurinn vegna reynsluleysis leiðsögumannanna.

Hér má nálgast ítarlegri útdrátt úr viðtalinu: http://www.telegraph.co.uk/news/worldnews/europe/norway/8728065/Norway-polar-bear-attack-boy-who-fought-killer-animal-says-Arctic-guides-too-inexperienced.html