Stoke samþykkir tilboð Sunderland í framherjann Ricardo Fuller

Stoke City hefur samþykkt 3 milljón punda tilboð Sunderland í framherjann Ricardo Fuller samkvæmt frétt á BBC. Þessi 31 árs gamli Jamaíkamaður hefur verið einn af þeim mönnum sem hefur haldið Eiði Smára Guðjohnsen aftarlega í goggunarröðinni hjá enska félaginu.

Sunderland er að leita sér að sóknarmanni til þess að fylla skarð Darren Bent sem félagið seldi til Aston Villa fyrir 18 milljónir punda í vikunni.

Fuller hefur skorað 48 mörk í 177 leikjum síðan að kom til Stoke frá Southampton sumarið 2006 en hann hefur verið markahæsti leikmaður liðsins undanfarin þrjú tímabil.

Það lítur einnig út fyrir að Stoke City ætli að fá Norðmanninn John Carew að láni frá Aston Villa og kæmi hann þá í staðinn fyrir Fuller sem þýðir að ekkert breytist hjá Eiði Smára sem er væntanlega að leið frá Stoke eins og Fuller.