Stallone sakaður um ritstuld

Leikstjórinn, leikarinn og handritshöfundurinn Sylvester Stallone hefur verið kærður fyrir ritstuld. Bandaríkjamaðurinn Marcus Webb segir Stallone hafa notað smásögu sína þegar harðhausinn skrifaði spennumyndina The Expendables.

Webb segir kvikmynd Stallones svipa mjög til smásögu sem hann skrifaði og gaf út árið 2006.

Stallone hefur ekki tjáð sig um málið en hann þekkir nokkuð vel til ritstuldar. Stuttu eftir að kvikmyndin Rocky var frumsýnd var Stallone kærður fyrir að hafa notast við ævisögu boxarans Chuck Wepner. Sátt náðist í því máli.

The Expendables kom út árið 2009 og var gríðarlega vinsæl. Kvikmyndin er æsispennandi saga um bandaríska málaliða sem berjast í senn við einræðisherra í Suður-Ameríku og tilfinningar sínar.