Þriðjungur af Taílandi er undir vatni

Um þriðjungur af Taílandi er nú undir vatni eftir mestu flóð í landinu á síðustu 50 árum.

Stjórnvöld tilkynntu í gærkvöldi að búið væri að loka einum af flugvöllum Bangkok vegna flóðanna. Um er að ræða Don Muang flugvöllinn en hann sinnir einkum innanlandsflugi í landinu.

Að minnsta kosti 350 manns hafa farist í flóðunum í Taílandi og margar milljónir af íbúum landsins hafa neyðst til þess að flýja heimili sín.

Þá hafa hrísgrjónaakrar landsins orðið fyrir verulegum skemmdum og Matvælastofnun Sameinuðu þjóðanna telur að alvarlegur matarskortur muni hrjá Taílendinga á næstunni vegna þess.