Rooney: Hættulegt að afskrifa okkur

Wayne Rooney, framherji Man. Utd, hefur varað fólk við því að afskrifa Man. Utd í baráttunni um enska meistaratitilinn. Rooney segir að reynslan muni fleyta United langt í vetur.

Man. City hefur verið í ótrúlegu formi í vetur, ekki enn tapað leik og unnið 11 af 12 leikjum sínum í deildinni.

"Það er alltaf hættulegt að afskrifa Man. Utd. Það hefur gerst nokkrum sinnum og oftar en ekki hafa menn þurft að éta orð sín. Það var meðal annars gert í fyrra en hvað gerðist," sagði Rooney.

"Við erum með nógu góðan mannskap til þess að vinna deildina og ef við erum enn í baráttunni um áramótin þá munum við gera tilkall til titilsins. Við vitum hvað þarf til. Við þekkjum þessa stöðu betur en önnur lið. Við höfum því ekki áhyggjur."