Hótar að kæra Kardashian

Grínistinn Rob Delaney hefur hótað að kæra athafnakonuna Kim Kardashian ef hún skilur við eiginmann sinn, Kris Humphries.

Kim og Kris hafa verið gift í 72 daga og var brúðkaupi þeirra sjónvarpað um allan heim. Kostnaðurinn við brúðkaupið var gríðarlegur og fjölluðu fréttamiðlar í Bandaríkjunum og víðar um athöfnina og aðdraganda hennar.

Delaney er allt annað en sáttur við hugsanlegan skilnað hjónanna. Á bloggi sínu segir Delaney að hann hati að vita hver Kim Kardashian sé. Hann hati hana þó ekki persónulega.

Hann ætlar einnig að kæra Ryan Seacrest, framleiðanda sjónvarpsþátta Kardashian, en hann kostaði einnig brúðkaup hennar og Kris. Delaney telur brúðkaupið hafa verið tilbúning til að hafa peninga af fólki og auglýsa Kardashian.

Ekki er vitað hvort að Delaney muni ganga alla leið og kæra Kardashian en reiði hans er ekki einsdæmi. Margir gagnrýna hjónabandið og segja sumir að það sé vanvirðing við baráttu samkynhneigðra, ásamt því að vera glórulaus peningaeyðsla á tímum efnahagskreppu.