Sjakalinn aftur fyrir rétt í Frakklandi

Sjakalinn, eða Ilich Ramirez Sanches, er frá Venesúela og hann kom sér í sviðsljós heimsins með látum þegar hann og félagar hans réðust inn á árlegan fund OPEC ríkjanna í Vín árið 1975. Þeir tóku 11 leiðtoga OPEC sem gísla og fengu að lokum lausnargjald fyrir þá upp á fleiri milljónir dollara. Sjakalinn náði síðan að flýja með lausnargjaldið. Þar með hófst hryðjuverkaferill sem stóð yfir í hátt í tvo áratugi.

Sjakalinn, sem orðinn er 62 ára gamall, hefur dvalist í frönsku fangelsi undanfarin 17 ár en hann var dæmdur í lífstíðarfangelsi þarlendis fyrir morðin á tveimur frönskum lögreglumönnum og líbönskum manni.

Réttarhöldin í dag fara fram fyrir sérstökum hryðjuverkadómstóli. Þau snúast um þátt Sjakalans í fjórum sprengjutilræðum í París í upphafi níunda áratugarins þar sem 11 manns fórust og 140 særðust.