Aðgerðum NATO lokið í Líbíu

Aðalritari Atlantshafsbandalagsins, Anders Fogh Rasmussen, lenti í Líbíu í dag og lýsti því yfir að aðgerðum NATO í landinu væri lokið. Sprengjuárásir NATO hjálpuðu byltingarhermönnum að koma höndum yfir fyrrverandi einræðisherra Líbíu, Muammar Gaddafi.

Öryggisráð Sameinuðu Þjóðanna tók ákvörðunina í kjölfarið á dauða Muammars Gaddafi, fyrrverandi einræðisherra Líbíu.

En þó svo að verkefni NATO sé lokið í Líbíu þá eru enn spurningar á lofti um dauða Gaddafi. Aðstandendur fyrrum einræðisherrans hafa tilkynnt að þau ætli að kæra dráp Gaddafis fyrir Alþjóðlega sakamáladómstólnum í Haag.

Samkvæmt myndbandsupptökum sást til Gaddafi á lífi í höndum byltingarhermanna. Banamein Gaddafi var skotsár á höfði og ekki er vitað hvernig það atvikaðist.

Þjóðarráðið í Líbíu hefur hafið rannsókn á drápinu.