Lést eftir hákarlaárás

Þrjátíu og tveggja ára bandarískur kafari lést af sárum sínum eftir að hvítahákarl réðst á hann undan ströndum vestur-Ástralíu í morgun.

Þetta er önnur banvæna hákarlaárásin í Ástralíu á aðeins tólf dögum en þann 10. október síðastliðinn lést 64 ára kaupsýslumaður eftir að hafa orðið fyrir barðinu á hákarli.

Maðurinn, sem lést í morgun, var einn að kafa við eyjuna Rottnest skammt frá bænum Perth og sáu sjónvarvottar um borð í bát loftbólur koma upp á yfirborðið og í kjölfarið fylgdi lík hans sem hafði augljóslega hlotið banvæn sár.

Nafn mannsins hefur ekki verið gert opinbert en yfirvöld segja hann hafa búið í Ástralíu og verið við vinnur þar.

Hákarlaárásir eru algengar við strendur Ástralíu en á síðustu fimmtíu árum hafa 53 látist eftir árásir hákarla.