Mancini: City þarf að læra það af United að vinna þegar liðið á lélegan leik

Roberto Mancini, stjóri Manchester City, segir að liðið sitt verði að læra þá list sem Manchester United hefur fullkomað, að vinna leiki þegar liðið spilar illa. Manchester United tekur á móti Manchester City í toppslag ensku úrvalsdeildarinnar í dag.

„United hefur eitt sem við höfum ekki. Þeir vinna oft leiki þegar þeir eru að spila illa. Þann hæfileika vantar í mitt lið," sagði Roberto Mancini og benti sérstaklega á leiki United á móti Norwich City og Chelsea á þessu tímabili.

„Þeir eru það sterkir að þeir þurfa ekki einu sinni að spila vel til þess að vinna. Munurinn liggur í andlega þættinum því þeir eru vanir því að vinna og trúa því alltaf að þeir geti unnið hvaða leik sem er þótt þeir séu ekki að ná sér á strik," sagði Mancini.

Manchester City hefur tapað fimm af síðustu átta leikjum sínum á móti Manchester United á marki á lokamínútunum þar af hafa fjögur sigurmarkanna komið á 90. mínútu. Wayne Rooney tryggði United 3-2 sigur á Old Trafford í fyrra með frábæru marki með hjólhestaspyrnu.

„Við spiluðum vel í fyrra og þeir spiluðu líka vel. Leikurinn var opinn allt til enda og Rooney skoraði ótrúlegt mark," sagði Mancini.

Leikur Manchester United og Manchester City hefst klukkan 12.30 í dag og er í beinni útsendingu á Stöð 2 Sport 2 og Sport 2 HD.