Dalglish: Þurfum bara smá heppni

Kenny Dalglish, stjóri Liverpool, er ánægður með hversu mörg tækifæri hans mönnum hefur tekist að skapa í undanförnum leikjum.

Leikmenn Liverpool hafa þó ekki verið nógu duglegir að nýta færin sín en liðið hefur gert þrjú jafntefli á heimavelli, nú síðast gegn Norwich um helgina.

„Mér finnst að við höfum verið frábærir í að skapa okkur færi,“ sagði Dalglish í viðtali á heimasíðu Liverpool. „Það er mikið ánægjuefni.“

„Við þurfum auðvitað að nýta þau betur en ef rýnt er í tölurnar má alveg eins gera ráð fyrir því að við getum skorað 5-6 mörk í einum leik.“

„Við þurfum bara smá heppni og um leið og hún færist yfir á okkar band þá hef ég engar áhyggjur af okkur.“

„Það er ekki hægt að segja að við höfum verið að spila illa. Við áttum meira skilið úr þessum leikjum.“