United aftur á sigurbraut

Javier Hernandez tryggði Manchester United nauman 1-0 sigur á Everton í fyrsta leik dagsins í ensku úrvalsdeildinni. Sigurinn er mikilvægur fyrir United-menn sem steinlágu fyrir Manchester City um síðustu helgi.

Hernandez skoraði markið snemma í leiknum er hann stýrði fyrirgjöf Patrice Evra frá vinstri í netið af stuttu færi. Tom Cleverly og Danny Welbeck voru báðir í byrjunarliði United í dag og áttu þátt í undirbúningnum.

Heimamönnum gekk illa lengst af að skapa sér færi en það lagaðist þó undir lok hálfleiksins. Þeir fengu þá tvívegis aukaspyrnu á hættulegum stað og úr þeirri síðari átti Leighton Baines glæsilegt skot sem hafnaði þó í slánni. Sóknarmenn Everton áttu nokkrar marktilraunir þar að auki en alltaf beint á David De Gea í marki United.

Bæði lið áttu sín færi í seinni hálfleik en heimamenn byrjuðu þó betur. United óx ásmegin eftir því sem leið á leikinn en þó var lítið um færi á báða bóga. Everton var líklega nærri því að jafna metin ef eitthvað var en leikmönnum United tókst að halda forystunni og tryggja sér þrjú dúrmæt stig.

Liðið er því komið upp í 23 stig og er tveimur á eftir toppliði Manchester City sem á leik til góða gegn Wolves síðar í dag.

Rio Ferdinand kom ekkert við sögu í leiknum en Nani kom inn á sem varamaður í liði United - fyrir Tom Cleverly sem varð að fara af velli í upphafi síðari hálfleiks vegna meiðsla.

Staðan í ensku úrvalsdeildinni