Van Persie tryggði Arsenal ótrúlegan 5-3 sigur á Chelsea

Robin van Persie skoraði þrennu og Arsenal vann glæsilegan 5-3 sigur á Chelsea í gjörsamlega ótrúlegum leik í ensku úrvalsdeildinni - enn og aftur. Arsenal komst með sigrinum upp í sjötta sæti ensku úrvalsdeildarinnar.

Arsenal lenti tvívegis undir í fyrri hálfleik er Frank Lampard og John Terry skoruðu fyrir Chelsea. Van Persie hafði náð að jafna metin fyrir Arsenal en Terry kom heimamönnum yfir undir lok hálfleiksins.

Arsenal komst svo yfir með tveimur mörkum á sex mínútna kafla í upphafi seinni hálfleiks. Fyrst Andre Santos og svo Theo Walcott.

Juan Mata jafnaði svo metin fyrir Chelsea þegar tólf mínútur voru til leiksloka en Robin van Persie átti eftir að eiga síðasta orðið. Fyrst skoraði hann á 85. mínútu eftir hræðileg varnarmistök heimamanna og svo kórónaði hann frábæran leik í uppbótartíma með þriðja marki sínu.

Sannarleg ótrúleg niðurstaða en þó svo að leiktíðin í Englandi sé enn nokkuð ung var þetta í sjöunda skiptið þar sem annað liðið skorar minnst fimm mörk í einum og sama leiknum. Yfirlit má sjá hér fyrir neðan.

Lampard skoraði mark sitt með skalla eftir fyrirgjöf og John Terry af stuttu færi eftir hornspyrnu. Fyrsta mark Van Persie skoraði hann af stuttu færi eftir laglegt þríhyrningsspil við Gervinho.

Andre Santos skoraði með hnitmiðuðu skoti í upphafi seinni hálfleiks og Theo Walcott eftir ótrúlega rispu þar sem hann prjónaði sig í gegnum varnarþvögu Chelsea þrátt fyrir að hafa hrasað í grasið. Juan Mata skoraði svo sitt mark með föstu skoti utan vítateigs.

Sannarlega ótrúlegur leikur þar sem varnarleikurinn var í algeru aukahlutverki, þá sérstaklega hjá þeim bláklæddu sem gerðu sig seka um ótrúlega klaufaleg mistök í stöðunni 3-3. Terry, sem þá var aftasti varnarmaður Chelsea, þurfti að teygja sig á eftir sendingu Malouda en hann datt og missti af boltanum.

Robin van Persie, sem átti frábæran leik, komst því einn gegn Cech og skoraði af miklu öryggi.

Sigurinn er kærkominn fyrir Arsenal sem átti í miklum erfiðleikum í upphafi leiktíðarinnar. Liðið tapaði til að mynda 8-2 fyrir Manchester United og 4-3 fyrir Blackburn en með þessum sigri lyfti liðið sér upp í sjötta sæti deildarinnar.

Chelsea er enn í þriðja sætinu með nítján stig, aðeins þremur á undan Arsenal. Manchester City er á toppnum með 25 stig en á leik til góða.

Leikir þar sem annað liðið hefur skorað fimm mörk:

Tottenham - Manchester City 1-5

Manchester United - Arsenal 8-2

Bolton - Manchester United 0-5

Bolton - Chelsea 1-5

Fulham - QPR 6-0

Manchester United - Manchester City 1-6

Chelsea - Arsenal 3-5