Jackson sprautaði sig sjálfur

Poppstjarnan Michael Jackson sprautaði sig sjálfur með lyfjunum sem drógu hann til dauða fyrir rúmum tveimur árum.

Svæfingalæknirinn Paul White bar í gær vitni í réttarhöldunum yfir Conrad Murray, lækni Jaksons, sem ákærður er fyrir manndráp af gáleysi. Hann sagðist viss um að poppstjarnan hafi gefið sjálfum sér ofskammt af svefnlyfinu propofol, sem talið er að hafi dregið hann til dauða þann 25.júní árið 2009, og að engar sannanir væru fyrir því að Murray hafi komið þar við sögu, líkt og saksóknari hefur haldið fram. Vitnisburður svæfingalæknisins þykir styrkja vörn Murrays til muna en á mánudag fær saksóknari, sem hefur dregið upp dökka mynd af lækninum fyrir rétti, tækifæri til að spyrja hann spjörunum úr.

Réttarhöldin hafa staðið yfir í fimm vikur en svæfingalæknirinn er síðastur til að bera vitni fyrir lokamálflutning beggja málsaðila. Að honum loknum tekur tólf manna kviðdómur sér hlé til að skera úr um hvort læknirinn er sekur eða saklaus. Murray hefur ávallt haldið fram sakleysi sínu en hann á yfir höfði sér allt að fjögurra ára fangelsisdóm og sviptingu starfsleyfis verði hann fundinn sekur.