Ætla með Legoland til Japan

Legoland heldur áfram að teygja út anga sína. Nýlega opnaði Legoland í Orlando í Flórída, verið er að byggja Legoland í Malasíu og innan fárra ára verður enn eitt opnað í Japan.

Dagblaðið Japan Times hefur eftir embættismanni í bænum Nagoya í miðhluta Japan að gert sé ráð fyrir að opnað verði árið 2015. Í Japan Times segir jafnframt að verið sé að leita að hentugu 10 hektara svæði þar sem hægt er að byggja upp skemmtigarðinn.

Nú þegar eru fimm Legolandgarðar í heiminum. Þeir eru í Billund í Danmörku, í Windsor á Bretlandseyjum, í Kalíforníu og Flórída í Bandaríkjunum og í Günzburg í Þýsklandi.