Moore hvatti mótmælendur til dáða

Rithöfundurinn og kvikmyndaframleiðandinn Michael Moore hvatti mótmælendur í Oakland í Bandaríkjunum í dag til dáða. Hann sagði að þeir hefðu blásið lífi og von í fólk. Fólkið mótmælir launaójöfnuði, spillingu í fyrirtækjum og aðgerðarleysi stjórnvalda.

Lögreglan beitti táragasi og öðrum valdbeitingartækjum til þess að hafa hemil á mótmælendum á þriðjudaginn. Moore, sem er þekktastur fyrir að hafa gert myndirnar „Fahrenheit 9/11" og „Bowling for Columbine", segir að almenningur hafi fyllst ógleði og skelfingu við þetta framferði lögreglunnar.

Samkvæmt frásögn CBS fréttastöðvarinnar í Bandaríkjunum hefur Jean Quan, borgarstjóri í Oakland, beðist afsökunar á atvikinu á sunnudaginn. Þar hafi fólk meiðst í aðgerðum lögreglunnar.

Mótmælin í Bandaríkjunum hafa staðið yfir í nokkrar vikur en þau hófust á Wall Street í New York.